劉小B ◎ Blog: 2008

2008年12月10日星期三

我似唔似蒙古人^o^

菲傭姐姐話因為見劉小B隻手仔凍凍, 所以無幫佢摺高衫袖,
劉小B見衫袖咁長,fing黎fing去好得意,就愈fing愈開心, 十足D蒙古人跳緊民族舞咁.....

2008年11月27日星期四

劉小B繼"打打"之後, 每隔一段時間就會有唔同既口頭禪,
包括"沙沙" "爸爸""ABC"等等
最近既口頭禪就係"媽咪"
可能每當佢講"媽咪"既時候都會得到很好的反應,
所以佢亦講得特別興奮.
不論對住貓貓, 狗狗, 菲傭姐姐, 或者自己條片片都係叫"媽咪"
而且仲會將"媽咪"組織成不同的句字,
例如咪咪媽咪媽咪咪, 媽咪媽咪媽媽咪
媽...咪媽...咪媽....咪
音調抑揚頓挫, 七情上面,
真係同你講緊野咁,
都幾有趣...........

2008年10月29日星期三

劉小B長大了^o^

自從過左一歲生日之後, 媽咪話我進步左好多, 簡直係一日千里. 今日我就第一次唔駛人扶, 由媽咪個房行去自己個房, 我又鍾意係塊神奇畫板度亂畫一通, 媽咪話有D似明星幫人簽名咁. 又會時不時幫媽咪檢查下手袋, 銀包啦~~ 鎖匙啦~~ 電話啦~~ 逐樣同佢攞哂出黎睇下有無帶漏野, 依家我識講好多太空話, 不過媽咪就淨係聽得明我講”打打”, 因為有次我講完”打打”之後就攞住個熊啤啤電話車落佢個頭度, 所以佢就明打打係點解勒. 除左破壞我都有建設既, 有次媽咪「浪」衫我都有幫手遞衫架添. 成長係要付代價的(係我成長, 爸爸媽媽付代價), 因為我唔再係一舊飯, 開始識反抗, 有要求, 有次就因為我扭計唔肯訓, 仲故意掉個奶咀落地(媽咪按: 即係拎住個奶咀, 然後望一望你, 奸笑一下再掉個奶咀囉) 結果媽咪唔肯比番個奶咀我, 我地對峙左半個鐘頭, 我喊到好眼訓就訓著左口勒………….

2008年10月1日星期三

借個火黎得口麻

兄弟, 借個火黎得口麻......

分別為聖

今日爸爸同媽咪帶左我去大埔, 經過吉之島的時候佢地就順便入去睇下, 正當爸爸shopping緊, 我同媽咪就百無了賴咁係男裝部遊蕩, 突然有個著住"開浪褲"(也有著片片的)哥哥仔好熱情咁向我走埋黎, 我當然係靜觀其變睇定D先, 話哂都係陌生男仔口麻, 係姐姐仔或者妹妹仔又唔同.

言歸正轉, 個哥哥仔走到埋黎二話不說就想搶去掛在我身上的"粉紅色超可愛媽咪送給我的愛心牙膠烏龜仔". 喂!細路, 你知唔知隻"粉紅色超可愛媽咪送給我的愛心牙膠烏龜仔"係分別為聖屬於我架, 你信左耶穌未? 有無返教會? 有無聽過牧師講分別為聖亞, 即係好似你支牙刷咁, 只得你一個可以用, 其他人唔用得咁解. 隻"粉紅色超可愛分別為聖兼媽咪送給我的愛心牙膠烏龜仔"(媽咪按:對於一個只得一歲的BB能這樣詳細的描述一舊牙膠真係相當難得, 各位看官請鼓掌)我啱啱先咬過, 仲有好多口水架, 只有我可以咬, 其他人唔咬得架.

故事的結局係由於我反應敏捷, 雙手捉實隻"粉紅色分別為聖屬於我超可愛愛心媽咪送給我的烏龜仔牙膠"(媽咪按: 已經講到亂哂籠, 畢竟佢都只係一個得一歲既BB), 再加上向佢怪叫左兩聲先至力寶不失咋 ^o^